Sikandar Shaikh Thar Accident : वाहनावरील नियंत्रण सुटलं, महाराष्ट्र केसरी सिकंदर शेखच्या गाडीचा अपघात; बक्षिसात मिळालेल्या थारची भीषण अवस्था

NewsZenn Jun 10, 2026 9 0

सांगली : सांगली जिल्ह्यातील सांगोल्यामधून एक मोठी बातमी समोर आली आहे. महाराष्ट्रातील प्रसिद्ध पैलवान, महाराष्ट्र केसरी, हिंदकेसरी विजेता सिकंदर शेख याच्या गाडीचा भीषण अपघात झाला आहे. सोलापूर आणि सांगली जिल्ह्याच्या बॉर्डरवर हा अपघात झाला आहे. हा अपघात इतका भयंकर होता की सिकंदर शेखच्या याच्या थार गाडीचा अक्षरश: चक्काचूर झाला आहे. सुदैवाने या मोठ्या अपघातातून पैलवान सिकंदर शेख थोडक्यात बचावला आहे.

अपघात नेमका कसा झाला?
या अपघाताबाबत मिळालेल्या सविस्तर माहितीनुसार, सोलापूर आणि सांगली जिल्ह्याच्या सीमेवर सांगोला-मिरज मार्गावर आज एक मोठा भीषण अपघात झाला. प्रसिद्ध कुस्तीपटू आणि महाराष्ट्र केसरी सिकंदर शेख याच्या कारचा भीषण अपघात झाला असून, सुदैवाने या अपघातात तो बालंबाल बचावला आहे. या अपघातात गाडीचं मोठ्या प्रमाणात नुकसान झालं आहे. मात्र, सिकंदर शेख याला कोणतीही गंभीर दुखापत झालेली नाही, अशी माहिती समोर येत आहे. विशेष बाब म्हणजे, ज्या थार गाडीचा अपघात झाला आहे, ती गाडी सिकंदर शेख याला कुस्ती जिंकल्यानंतर बक्षिस म्हणून मिळाली होती.

काही कामानिमित्त बाहेर गेलेला
सिकंदर शेख हा आपल्या प्रवासानिमित्त सांगोला-मिरज मार्गावरून जात असताना हा अपघात घडला. रस्ता आणि वाहनावरील नियंत्रण सुटल्यानं हा अपघात झाल्याचा प्राथमिक अंदाज वर्तवला जात आहे. अपघाताची तीव्रता इतकी मोठी होती की गाडीचा समोरचा आणि बाजूचा भागाचा पूर्णपणे चक्काचूर झाला आहे. अपघाताचं वृत्त समजताच परिसरातील नागरिकांनी आणि त्यांच्या चाहत्यांनी घटनास्थळाकडे धाव घेतली. दरम्यान, सिकंदर शेख हे महाराष्ट्राच्या कुस्ती क्षेत्रातील सर्वात लोकप्रिय नाव आहे. महाराष्ट्रातीलच नव्हेतर देशभरातील प्रसिद्ध मल्लांना आस्मान दाखवत सिकंदर शेख याने कुस्तीच्या मैदानात आपला दबदबा निर्माण केला आहे. सिकंदर शेख याने महाराष्ट्र केसरीसह अनेक मानाच्या स्पर्धा जिंकत कुस्ती क्षेत्रात मोठं नाव कमावलं आहे. दरम्यान, या अपघातानं परिसरात खळबळ उडाली आहे.