Pune Crime : पुण्यातील उच्चशिक्षित महिलेला मूत्र प्राशन करण्यास भाग पाडलं; शॉक देऊन अत्याचार, पोलिसांकडून ८ जणांना अटक

NewsZenn Jun 18, 2026 6 0

पुणे : स्वतःला ईश्वराचा अवतार असल्याचे भासवून एका उच्चशिक्षित महिलेवर १७ वर्षे लैंगिक अत्याचार, मानसिक आणि शारीरिक छळ केल्याचा प्रकार समोर आला आहे. खराडी येथील कथित ढोंगी बाबा राधामोहन मिश्रा (वय ५९) याने हा अत्याचार केल्याचा आरोप असून, पीडितेच्या तक्रारीनंतर मुख्य आरोपी मिश्रासह आठ जणांविरुद्ध बलात्कार, कट रचणे, शारीरिक व मानसिक छळ; तसेच महाराष्ट्र नरबळी आणि इतर अमानुष, अनिष्ट व अघोरी प्रथा व जादूटोणा प्रतिबंधक कायद्यासह विविध कलमांनुसार गुन्हा दाखल करून त्यांना अटक केली.

पोलिसांनी दिलेल्या माहितीनुसार, पीडित महिला उच्चशिक्षित असून, पुण्यातील खासगी कंपनीत नोकरी करते. तिचे कुटुंब मूळचे हरियाणातील असून, तिचे आई-वडील वैद्यकीय व्यवसायाशी संबंधित आहेत. २५ वर्षांपूर्वी कुटुंबाची ओळख स्वामी केवल नयन यांच्या माध्यमातून राधा मोहन मिश्रा याच्याशी झाली. त्यानंतर संपूर्ण कुटुंब त्याच्या प्रभावाखाली गेले. सन २०१०मध्ये कुटुंब पुण्यात आल्यावर पीडिता आश्रमाच्या संपर्कात राहू लागली आणि तिच्यावर कथितपणे मानसिक, शारीरिक व लैंगिक अत्याचार सुरू झाले. तसंच या नराधमाने पीडित महिलेला त्याचे मूत्र प्राशन करण्यास भाग पाडले आणि काही वेळा इलेक्ट्रिक शॉक दिला, असाही आरोप करण्यात आला आहे. महिलेच्या तक्रारीनुसार, आरोपीने १७ वर्षे तिचे लैंगिक शोषण केले. तिने अनेकदा पालकांना याबाबत सांगूनही तिच्यावर विश्वास ठेवला गेला नाही.

...अन् लग्नात अडथळे

आध्यात्मिक मार्गदर्शनाच्या नावाखाली पीडितेला तिच्या वैयक्तिक आयुष्याबाबत लिखित माहिती देण्यास सांगून तिला धमकावल्याचा आरोप आहे. महिलेने यातून बाहेर पडण्यासाठी विवाहाचा प्रयत्न केला. मात्र, आरोपीने तिच्या वैवाहिक आयुष्यातही हस्तक्षेप केला. अखेरीस पुरावे गोळा करून पीडितेने कुटुंबीयांना माहिती दिल्यावर कुटुंबीयांनी पोलिसांकडे धाव घेतली.

अटक बेकायदा? वकिलांनी काय दावा केला?

मुख्य आरोपीचे तक्रारदारांच्या वडील व भावासोबत मालमत्तेसंदर्भात वाद दिवाणी न्यायालयात प्रलंबित आहेत. ते टाळण्यासाठी १६ वर्षांपूर्वी अत्याचार केल्याचा गुन्हा दाखल केला आहे. या प्रकरणात आरोपींची अटक बेकायदा असून, त्याविरोधात उच्च न्यायालयात दाद मागण्यात येईल, असा युक्तिवाद ॲड. ठोंबरे यांनी केला. दोन्ही बाजूंचा युक्तिवाद ऐकल्यावर न्यायालयाने आरोपींना २० जूनपर्यंत पोलिस कोठडी सुनावली.

या प्रकरणात मुख्य आरोपी राधामोहन मिश्रा याच्यासह आठ आरोपींना न्यायालयात हजर करण्यात आले. आरोपीने इतर महिलांचे लैंगिक शोषण केले असल्याची शक्यता आहे. आरोपीने पीडितेचे आक्षेपार्ह चित्रीकरण केले असून, ते कोणाला प्रसारित केले आहे का, त्याचे आणखी कोणी साथीदार आहेत का, याबाबत तपासासाठी आरोपीला पोलिस कोठडी देण्याची मागणी तपास अधिकारी वरिष्ठ निरीक्षक संजय चव्हाण आणि सरकारी वकिलांनी केली. आरोपीतर्फे ॲड. विजयसिंह ठोंबरे, ॲड. निवृत्ती कराड आणि ॲड. सुधीर शहा यांनी बाजू मांडली.