Tukaram Mundhe Action : पुण्यात शक्तिशाली वेदनाशामक औषधांचा बेकायदेशीर व्यापार, FDA आणि ANC ची संयुक्त धाड, दोघे गजाआड

NewsZenn Jun 18, 2026 6 0

पुणे : अमली पदार्थांच्या गैरवापराला आळा घालण्यासाठी आणि औषधांच्या बेकायदेशीर विक्रीविरुद्ध कठोर भूमिका घेत अन्न व औषध प्रशासन (एफडीए) आणि पुणे गुन्हे शाखा अँटी नार्कोटिक्स सेल-१ यांच्या संयुक्त पथकाने पुण्यात मोठी कारवाई केली आहे. या कारवाईत ट्रामाडोलयुक्त औषधांची बेकायदेशीर विक्री करणाऱ्या दोघांना अटक करण्यात आली आहे. तसेच मोठ्या प्रमाणात औषधसाठा जप्त करण्यात आला आहे.

अँटी नार्कोटिक्स सेल-१ यांना प्राप्त झालेल्या गोपनीय माहितीनुसार, मुकेश भुराराम सिरवी (वय २८ वर्षे) हा कोणताही वैध औषध विक्री परवाना नसताना SPAS-TRASCEN-PLUS या ट्रामाडोलयुक्त औषधाची बेकायदेशीर विक्री करीत असल्याचे निदर्शनास आले. सदर माहितीची पडताळणी करून अन्न व औषध प्रशासन आणि अँटी नार्कोटिक्स सेलच्या अधिकाऱ्यांनी संयुक्तरीत्या कारवाईचे नियोजन केले. औषध निरीक्षक, अन्न व औषध प्रशासन, पुणे विभाग तसेच अँटी नार्कोटिक्स सेल-१ यांच्या संयुक्त पथकाने ताडीवाला रोड परिसरातील संबंधित ठिकाणी छापा टाकला.

तपासणीदरम्यान SPAS-TRASCEN-PLUS (Dicyclomine Hydrochloride, Tramadol Hydrochloride आणि Acetaminophen Capsules) या औषधांचा मोठा साठा आढळून आला. या कारवाईत एकूण ७३ बॉक्सेसमधील १०,४९२ कॅप्सूल्स जप्त करण्यात आल्या. जप्त औषधांची अंदाजे किंमत ६८,३२८ रुपये इतकी आहे. त्यामध्ये ४२४.०६ ग्रॅम ट्रामाडोल आढळून आले. हे प्रमाण अमली पदार्थ आणि मनःप्रभावी पदार्थ अधिनियम ( NDPS Act ) अंतर्गत निर्धारित "व्यावसायिक प्रमाण" (Commercial Quantity) श्रेणीत मोडत असल्याने या प्रकरणाचे गांभीर्य अधिक वाढले आहे.

ट्रामाडोल हे एक शक्तिशाली वेदनाशामक औषध असून त्याचा वैद्यकीय सल्ल्याशिवाय अथवा गैरवापरासाठी वापर केल्यास व्यक्तीच्या शारीरिक आणि मानसिक आरोग्यावर गंभीर परिणाम होऊ शकतात. अशा औषधांचा बेकायदेशीर व्यापार युवकांमध्ये व्यसनाधीनता वाढविणारा असून सार्वजनिक आरोग्यासाठी गंभीर धोका निर्माण करणारा आहे.

तपासादरम्यान सदर औषधांचा पुरवठा निलेश मोघे यांच्यामार्फत होत असल्याचे निष्पन्न झाले. त्यानुसार पोलिसांनी मुकेश भुराराम सिरवी आणि निलेश मोघे या दोघांना अटक केली आहे. तसेच संबंधित पुरवठा साखळीतील इतर व्यक्तींच्या भूमिकेचाही तपास सुरू असून संपूर्ण वितरण व्यवस्थेचा शोध घेण्यात येत आहे.

या प्रकरणी बंडगार्डन पोलीस ठाण्यात अमली पदार्थ आणि मनःप्रभावी पदार्थ अधिनियमांतर्गत कलम ८(क), २२(क) आणि २९ अन्वये गुन्हा दाखल करण्यात आला असून पुढील तपास अन्न व औषध प्रशासन आणि अँटी नार्कोटिक्स सेल यांच्या समन्वयाने सुरू आहे.

"रामाडोलसारख्या औषधांचा गैरवापर युवकांमध्ये व्यसनाधीनता वाढविणारा असून सार्वजनिक आरोग्यासाठी गंभीर धोका निर्माण करतो. या बेकायदेशीर पुरवठा साखळीतील प्रत्येक घटकाविरुद्ध कठोर कारवाई केली जाईल", अशी प्रतिक्रिया अन्न व औषध प्रशासनाचे आयुक्त तुकाराम मुंढे यांनी दिली आहे.