Pune News : लग्नासाठी 17 कोटींचा महाल बूक, पण त्याआधीच आक्रित; होणाऱ्या पत्नीसोबत लोहगडावर ट्रेकिंग, पुण्यातील तरुणाचा वेदनादायी शेवट

NewsZenn Jun 19, 2026 27 0

लोणावळा : नियोजित पत्नीच्या वाढदिवसानिमित्त मावळातील लोहगड किल्ल्यावर ट्रेकिंगसाठी गेलेल्या तरुणाचा सुमारे चारशे फूट खोल दरीत पडून दुर्दैवी मृत्यू झाला. लग्नाची गाठ बांधण्यापूर्वीच मृत्यूने गाठल्याने हळहळ व्यक्त होत आहे. ही घटना गुरुवारी सकाळी साडेदहा वाजता घडली. केतन विशाल अग्रवाल (वय २६, लोढा बेलमोंडो सोसायटी, गहुंजे, ता. मावळ) असे दरीत पडून मृत्यू झालेल्या तरुणाचे नाव आहे.

प्रसिद्ध बिल्डरचा मुलगा
केतनच्या मागे आई, वडील, बहीण, दोन चुलते, दोन चुलतभाऊ असा परिवार आहे. वडील विशाल अग्रवाल हे प्रसिद्ध बांधकाम व्यावसायिक असून, केतनदेखील बांधकाम व्यावसायिक होता. नियोजित पत्नीच्या वाढदिवसानिमित्त दोघे लोहगडावर ट्रेकिंगला गेले होते. त्यांचे लग्न उदयपूर, राजस्थान येथे होणार होते; परंतु लग्नाची तारीख अंतिम झाली नव्हती.

ट्रेकिंग करताना चारशे फूट खोल दरीत
लोणावळा ग्रामीण पोलिस निरीक्षक दिनेश तायडे यांनी दिलेल्या माहितीनुसार, गुरुवारी सकाळी केतन हा त्याच्या नियोजित पत्नीसह कारने लोहगड येथे आला होता. यानंतर दोघांनी ट्रेकिंगला सुरुवात केली. ट्रेकिंगच करीत असताना गडावरील एका कड्यावरून अचानक केतनचा तोल गेला आणि तो चारशे फूट खोल दरीत पडला. गंभीर जखमी झाल्यामुळे त्याचा जागीच मृत्यू झाला.

घटनेची माहिती मिळताच लोणावळा ग्रामीण पोलिस निरीक्षक दिनेश तायडे, पोलिस कर्मचारी पवन कराड, जय पवार, प्रशांत तुरे, प्रणय उकिरडे यांनी घटनास्थळी धाव घेऊन घटनेची पाहणी केली.

तीन तासांची शोधमोहीम
पोलिसांनी या घटनेची माहिती लोणावळ्यातील शिवदुर्ग मित्र आपत्कालीन पथकाला कळविली. घटनेची माहिती मिळताच शिवदुर्ग मित्र आपत्कालीन पथक घटनास्थळी दाखल झाले. पथकातील सदस्यांनी तीन तासांच्या परिश्रमानंतर केतनची बॉडी लोहगड परिसरातील घनदाट झाडीतून बाहेर काढून गडाच्या पायथ्याशी आणली. सायंकाळी उशिरा केतनच्या पार्थिवावर निगडी येथे शोकाकुल वातावरणात अंत्यसंस्कार झाले.

ग्रँड विवाह सोहळ्यापूर्वीच काळाचा घाला
केतनच्या लग्नाची तयारी दोन्ही कुटुंबीयांकडून जोरदारपणे सुरू होती. लग्नासाठी उदयपूर येथे १४ कोटी रुपये खर्चून कुटुंबीयांनी एक आलिशान महाल बुक केला होता; तसेच उदयपूरला जाण्यासाठी दोन स्वतंत्र विमानांचे बुकिंगदेखील करण्यात आले होते. अतिशय ग्रँड विवाह सोहळा साजरा करण्याची दोन्ही कुटुंबांत तयारी सुरू असताना नियतीच्या मनात मात्र काही वेगळेच होते. केतनच्या अचानक जाण्याने दोन्ही कुटुंबीयांना मोठा धक्का बसला आहे.